മലപ്പുറം: സംസ്ഥാനത്തെ ഉയർന്ന പോളിംഗ് ഭരണവിരുദ്ധവികാരത്തെയാണ് സൂചിപ്പിക്കുന്നതെന്ന് പി.കെ.കുഞ്ഞാലിക്കുട്ടി. യുഡിഎഫ് അധികാരത്തിലെത്തിയാൽ ഉപമുഖ്യമന്ത്രി സ്ഥാനം മുസ്ലിം ലീഗ് അങ്ങോട്ട് ആവശ്യപ്പെടില്ല. ലീഗ് മുന്നണിയെ പ്രതിസന്ധിയിലാക്കില്ല.
പ്രശ്നങ്ങളില്ലാതെ കോൺഗ്രസ് മുഖ്യമന്ത്രിയെ തീരുമാനിക്കണം. കോൺഗ്രസിന് എല്ലാ പിന്തുണയും ലീഗ് നൽകി. 100ന് മുകളിൽ സീറ്റ് നേടി യുഡിഎഫ് അധികാരത്തിൽ വരും. കണക്ക് കൂട്ടി തന്നെയാണ് ഇതു പറയുന്നത്. യുഡിഎഫ് ആത്മവിശ്വാസത്തിലാണെന്നും കുഞ്ഞാലിക്കുട്ടി പറഞ്ഞു.
അതേസമയം ഉപമുഖ്യമന്ത്രി സ്ഥാനത്തിന് ലീഗിന് അർഹതയുണ്ടെന്ന് പാണക്കാട് മുനവറലി ശിഹാബ് തങ്ങൾ പറഞ്ഞു. എന്നാൽ ഇപ്പോൾ അവകാശ വാദം ഉന്നയിക്കുന്നില്ലെന്നും അദ്ദേഹം വ്യക്തമാക്കി.